Vieiros

Os actos comezan o luns 5 de marzo, ás 18.00, coa conferencia "Prioridades da muller na idade dourada", a cargo da psicóloga Mónica Calvo Serrano. Será no local da Asociación Agarimo (rúa San Xosé,22). Ao día seguinte, o ámbito é o lexislativo: a psicóloga Ildete Magallaes fala sobre "As mulleres e os seus dereitos" ás 18.00, na parroquia do Cristo da Vitoria (rúa Baiona,9-Coia).

O día 7 serán representadas dúas obras de teatro: Rosa de dous aromas, a cargo do grupo Rosalía de Castro da Asociación Veciñal"Fonte do Galo", no local social da asociación, ás 19.00, e A voda do señor Esganarello no salón parroquial do Cristo, a cargo de Mulleres de Moaña. Na primeira, do mexicano Emilio Carballido, dúas mulleres tópanse no cárcere co mesmo obxectivo: liberaren a un violador. A segunda é unha comedia de Molière, na versión de Pillado Mayor, na que o dramaturgo francés critica as imposicións da sociedade burguesa do seu momento, entre elas, o matrimonio de conveniencia.

Pero o acto máis destacábel é a manifestación do 8 de marzo, este ano co lema "Elixe: Compartir ou Discriminar". Organízaa a Coordinadora Local da Marcha Mundial das Mulleres co patrocinio da Concellería da Muller de Vigo, partirá ás 20.00 da Praza de Portugal e rematará na Porta do Sol. E outro evento salientábel é a proxección do documental co que Mulheres Nacionalistas Galegas celebran 20 anos de feminismo: 20 anos desafiando ao patriarcado, o día 16 na Casa das Mulleres (r/ Romil, 20).