Vieiros

Hai case cen anos, entre o 28 de agosto e o 3 de setembro de 1910, o Ungdomshuset acolleu a segunda conferencia da Internacional Socialista de Mulleres. Foi nesta histórica xuntanza, a proposta da líder do movemento socialista alemán Clara Zetkin (1857-1933), na que se adoptou adicar un día no ano a chamar a atención da sociedade sobre o sufraxio feminino e a súa emancipación política: o Día Internacional da Muller.

O 19 de marzo do ano seguinte celebrouse por primeira vez esta homenaxe reivindicativa. Máis dun millón de persoas asistiron as marchas e aos mitins convocados en Alemaña, Austria, Dinamarca e Suíza. Esixiuse o dereito a voto, o dereito a ocupar cargos públicos, o do traballo, e o dereito á formación profesional e á non discriminación laboral.

23 de febreiro xuliano
Porén, a proposta da Internacional Socialista de Copenhague -aprobada unanimemente co voto das máis de cen mulleres de 17 países diferentes e inspirada no Women's Day das socialistas estadounidenses- non estabelecía unha data fixa para a súa celebración. Xa que logo, non foi até o 1917 cando por primeira vez ocupase o 8 de marzo no calendario.

Concretamente, foi o domingo 23 de febreiro (polo calendario xuliano, usado en Rusia), día no que milleiros de mulleres rusas se amotinaron ante a falla de alimentos, o que provocou o inicio do proceso revolucionario que acabaría no mes de outubro dese mesmo ano.

Aqueles sucesos levaron a estabelecer definitivamente a data do Día Internacional da Muller no 8 de febreiro, festa nacional nos antigos países da órbita soviética, así como tamén nas Nacións Unidas dende a súa fundación.