Vieiros

Vicepresidencia asinará un convenio coa Fundación Rogelio Groba por valor de 150.000 euros para que se ofrezan concertos en Lugo, Vigo, Santiago, Allariz, Ourense, Ponteareas, A Coruña, Pontevedra, Barcelona, Valencia, Bilbao, Zaragoza e Bos Aires. Tocará a Orquestra de Cámara Galega, formada integramente por profesionais da terra.

Pola súa banda, a Consellería de Cultura e Deporte colaborará coa fundación dedicada ao mestre Groba para a conservación do seu arquivo e a difusión da súa obra, mentres que Vivenda e Solo poñerá á súa disposición unha sede oficial, para o que se rehabilitará un edificio do centro de Ponteareas.

Na súa intervención, o vicepresidente da Xunta afirmou que é o momento de rematar coa cultura oficial "do autoodio, da indiferenza e do desprezo polo propio" e facer "o que calquera nación fai cos seus artistas: apoiar o seu traballo e dotalos dos medios e dos recursos precisos para que as súas obras poidan ser conservadas, difundidas e coñecidas pola xente".