Vieiros

A Dirección Xeral para o Deporte está a darlle sentido ao seu lema "Crecendo desde a base" co anuncio das axudas que recibirán este ano clubs, entidades, federacións e concellos en relación co deporte de base. As subvencións ascenden a 14.700.000 euros, o que supón un incremento en relación a 2006 de case 1.200.000 euros, un 8,7%.

Segundo o director xeral para o Deporte, Santi Domínguez, o tecido asociativo "é fundamental, xa que son os clubs e as asociacións, xunto cos seus dirixentes, os máximos responsábeis do traballo na sociedade, cos nenos e nenos, e por iso en 2006, por primeira vez, abriuse unha liña de axudas directas aos clubs e entidades deportivas". Domínguez sinalou que no presente ano "vaise continuar con esa liña de actuación, axudando a estas asociacións nas súas actividades deportivas".

Na conferencia de prensa, Bugallo e Domínguez tamén adiantaron que outra das liñas de axuda irá destinada ás federacións, "coas que se volverán a asinar convenios de colaboración, tal e como xa sucedeu o ano anterior". Pola súa parte, os concellos recibirán 420.000 euros co obxectivo de colaborar en programas de fomento de actividades deportivas así como seguir adiante coa apertura das instalacións deportivas dos centros escolares fóra do horario escolar.