Vieiros

Na actualidade, a central eléctrica de Sabón aliméntase con fueloil, e apenas funciona varios días no ano, sobre todo no inverno, cando a demanda de electricidade aumenta. Tras a finalización das obras de adaptación ao ciclo combinado de gas, esta pasará a traballar continuamente todo o ano, co correspondente prexuízo para os veciños, que xa agora se queixan do excesivo ruído.

Luz López, representante da Plataforma de Oseiro, afirma que ese é outro proceso paralelo -nos vindeiros días van presentar alegacións ao informe de impacto ambiental- ao actual: "Hoxe (polo mércores) o que fixemos é denunciar oficialmente a ilegalidade, por outro lado obvia, das obras, xa que carecen de licenza municipal". Neste sentido, a Plataforma cualifica a actitude do concello de "desvergoña".

Porén, o obxectivo último é conseguir o traslado das liñas de alta tensión, algo polo que os veciños de Oseiro levan a pelexar abondo. "De conseguiren finalizar as obras, xa non haberá marcha atrás e as liñas ficarán onde están", sinala Luz López, quen lembra que hai pouco máis de catro anos, o Concello de Arteixo, a Xunta e Unión Fenosa comprometéronse ao traslado. "Firmaron un convenio polo cal a Xunta achegaba 800 millóns de pesetas e o concello buscaba uns novos terreos", comenta, "mais, este expirou o pasado 31 de decembro".

Dende a Plataforma están a tratar de lograr un compromiso da Consellería de Industria para que esta negocie directamente con REE -actual propietaria das liñas, e que nunca quixo asumir o convenio asinado por Unión Fenosa. Segundo declarou Luz López, esta xuntanza poderíase producir en vindeiras datas.