Vieiros

A xornada estivo organizada polo Colexio Oficial de Enxeñeiros de Telecomunicación de Galiza (COETG) e contou coa asistencia de distintos profesionais do sector das telecomunicacións e novas tecnoloxías entre os que se atoparon o conselleiro da Comisión de Mercado de Telecomunicaciones (CMT), Antoni Elías Fusté, o subdirector de Relacións Externas da ETS de enxeñeiros de Telecomunicación da Universidade de Vigo, Juan Carlos Burguillos Rial e o xerente de Enxeñería e Deseño dentro da División de Rede de R, Cable e Telecomunicacións Galiza, Ignacio Penedo Nieto, que afondou nas experiencias de R en achegar a fibra ao fogar.

Por outro lado, os ponentes e membros de COETG falaron sobre o "papel clave" das corporacións locais no despregue deste tipo de solucións de trasmisión de datos ata os fogares a través da fibra óptica. Na opinión dos expertos, estes axentes locais serían figuras demandantes, catalizadoras e dinamizadoras do despregue deste tipo de infraestructuras, ademais da prestación de servizos aos seus cidadáns e ás empresas colaboradoras.

Finalmente, os asistentes a esta primeira xornada comentaron as posibilidades da fibra óptica como sistema de transmisión e destacaron o papel dos enxeñeiros de telecomunicación na integración dos servizos e/ou a asesoría a diversas entidades na xestión e operación destes novos activos, así como na definición de estratexias, "creando unha nova oportunidade de negocio para os profesionais das telecomunicacións" emprendedores e libre-actuadores, ademais de como asesores necesarios en materia de FTTH tamén á hora de colaborar coas empresas prestadoras de servizos.