Vieiros

"Feijoo xa coñecía, por moitos, os riscos da personaxe en cuestión, agora tócalle a el só lidar con ese touro". Así se refiren na bitácora Libertad Popular, escrita por simpatizantes do PPdeG, a María Faraldo, responsábel da carta enviada aos alcaldes do partido sobre os convenios antiincendios. "Con estrategas como Faraldo onde o falar non ten cancela imos apañados, e se aínda por riba os pensamentos mándaos por correo e asinados, apaga e ímonos", comentan. As estratexias a nivel interno no PPdeG coruñés durante o proceso sucesorio do partido, onde a propia Faraldo e o presidente do PP coruñés, Juan Juncal, foron estreitos colaboradores de Alberte Núñez Feijoo, foron froito habitual de críticas desde a militancia e algúns sectores do PP. O seu protagonismo na xestión da revolta que deu lugar á escisión do partido na capital herculina, e as queixas por presións varias e pola presunta belixerancia na imposición da liña oficial, foron outros capítulos. De momento, desde a dirección dos populares galegos non se pronunciaron sobre o documento, evitando explicar deica agora se a circular tiña a beizón ou se formou parte da estratexia definida e promovida desde a propia dirección do PPdeG.