Vieiros

O conselleiro non quixo valorar aínda o que esa participación pública pode significar en volume de ingresos, apuntando que a cota final dependerá de factores tales como a propia dimensión da empresa e a produción dos seus xeneradores eólicos, tamén en canto a horas de vento.

Con todo, o requisito introducido pola consellaría como unha das condicións para as empresas que optan ás concesións, vaille afectar en exclusiva a esas empresas que aspiran a novas licenzas para a explotación dos 750 megavatios que serán concedidos proximamente, quedando fóra as xa concedidas polo executivo anterior. Á beira, a Xunta establecerá fórmulas de participación similares, que garantan beneficios públicos, na concesión de vindeiros dereitos de explotación doutros recursos, tales como as minicentrais ou as instalacións de enerxía solar. O obxectivo é que no futuro, a esixencia da participación pública pase de ser un simple criterio extra para a valoración a unha requerimento indispensábel para presentarse aos concursos.