Edición xeral
Quenda galega no consello de ministros da Unión Europea
En calidade de conselleiros de Pesca, Enrique López Veiga e Carme Gallego xa iniciaran a participación galega nos consellos de ministros da Unión Europea, aínda que nunha representación máis simbólica que a que agora terán os representantes da Xunta. Xa que logo, deica final de ano, Galiza asumirá por vez primeira a coordinación da participación autonómica en dous consellos de ministros da Unión Europea. O vicepresidente Anxo Quintana, e os conselleiros de Traballo e Industria, levarán a voz galega a ese foro.
Anxo Quintana será o primeiro en intervir nun consello de ministros da UE, os próximos 13 e 14 de novembro. Os seguintes 31 de novembro e 1 de decembro estarán o propio Quintana e os conselleiros de Traballo, Ricardo Varela, e de Industria e Innovación, Fernando Blanco.
Segundo explicaron este martes o secretario xeral de Relacións Exteriores, Santiago Gómez-Reino, e o subdirector xeral de Relacións coa Unión Europea, Manuel Morán, isto será posíbel porque a Galiza correspondeulle, ao fío dos acordos nas conferencias sectoriais, a coordinación a nivel estatal das áreas de Xuventude, Emprego e Política Social e Consumo. O desafío inclúe a definición dunha posición conxunta non só a nivel de todas as comunidades autónomas senón tamén xunto co goberno español, de xeito que o Estado defenda no foro europeo unha postura común e o máis próxima posíbel aos intereses de todas as comunidades.
Ligazóns
- Anteriores: Os cidadáns sobre a Euroconstitución: Ou que a revisen ou que a desboten
- Porta aberta para a voz galega nos Consellos de ministros da UE
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto