Vieiros

O informe presentado o pasado 26 de maio pola Coordinadora para a Prevención da Tortura denuncia que polo menos 3.000 persoas puideron ser torturadas e/ou maltratadas no Estado español no que levamos de século XXI. Estes datos supoñen unha media de 600 persoas afectadas ao longo do ano por esta problemática, case dous ao día. Deste xeito, o Informe 2005 denuncia a persistencia da tortura e os malos tratos no Estado e considera que é fundamental a aplicación do Protocolo Facultativo da Convención das Nacións Unidas máis alá do plano institucional e que sexa a sociedade civil a encargada de velar polo seu cumprimento.

O informe reflicte denuncias en todas as comunidades autónomas, porén son Euscadi, Andalucía, Cataluña e Madrid onde se concentraron máis de dous terzos do total. Pola súa parte, Galiza foi o escenario de 14 denuncias. Se atendemos ás circunstancias das persoas que as presentaron, os grupos que xeraron máis denuncias foron os movementos sociais, os colectivos de inmigrantes e as persoas detidas en réxime de incomunicación. Noutro extremo, segundo o corpo de funcionarios que custodiaban á persoa no momento de producirse os feitos que orixinaron a denuncia, os resultados reflicten que practicamente todos os corpos policiais e de forzas da seguridade recibiron denuncias ao longo do 2005, especialmente o Corpo Nacional de Policía (69 casos), Policía Local (84) e Funcionarios de Prisión (62). Do total dos casos denunciados no 2005, o 16 por cento xa recibiron condena firme, un 52 aínda permanecen baixo investigación e o 31 por cento foron absoltos.