Vieiros

Os traballadores do metal botáronse desde onte as rúas de Vigo na procura dun convenio que reduza a eventualidade do sector e que recolla un aumento salarial dun 4 por cento sobre o IPC. Xa é coñecido en toda a cidade que "cando o metal para, para toda a cidade" e esta vez non é unha excepción. Aínda que con numerosos actos vandálicos, as xornadas de manifestacións estanse a celebrar sen incidentes de relevancia. Os principais accesos a cidade foron cortados, tanto hoxe como onte, provocando longas retencións na AP-9. Deste xeito, as principais prazas e rúas da cidade tamén foron invadidas polos manifestantes provocando o caos circulatorio no centro de Vigo. Na noite do mercores arrancaba un novo intento de negociación entre a patronal do metal e os sindicatos UGT, CCOO e CIG na que a delegación de Traballo exerceu de mediadora. Porén, as partes implicadas non chegaron a un acordo, polo que as manifestacións e movilizacións seguiranse celebrando durante os próximos días. Segundo Tomás Lorenzo, de CCOO, os sindicatos aínda non recibiron unha nova proposta de diálogo logo da ruptura de negociacións do mercores e de momento, non cre que esta chegue antes da próxima semana. O paro no naval, automoción, electricidade, talleres de reparación de automóbiles, técnicos de calefación e electricistas afectou ata as empresas do sector con convenio propio, xa que a produción destas depende en gran medida da industria auxiliar.