Vieiros

Á parte dos representantes da AGE e de Cultura, co director xeral de Creación e Difusión Cultural, Lois Bará, a delegación galega inclúe á Asociación Galega de Profesionais da Ilustración, a do Libro Infantil e Xuvenil e do VII Salón do Libro de Pontevedra. O obxectivo que se marca é favorecer os contactos entre profesionais do sector para fortalecer a presencia galega no exterior e a accesibilidade en Galicia das obras internacionais de creación recente.

As editoriais galegas que estarán representadas na feira son dezasete: A Nosa Terra, Baía Edicións, Ediciós do Castro, Edicións do Cumio, Everest Galicia, Galaxia, Ir Indo, Kalandraka, Nova Galicia, OQO, Obradoiro, Tambre, Xerais, Rodeira, Sotelo Blanco e Toxosoutos. Fisicamente, en Boloña haberá quince persoas de sete selos galegos -A Nosa Terra, Edicións do Cumio, Galaxia, Hércules de Ediciones, Kalandraka, Nova Galicia e OQO- que ultiman nestes días as axendas para unha feira, abundan os editores, "na que a compravenda de dereitos e o intercambio de experiencias son os obxectivos principais".

O catálogo Children´s books from Galicia, editado por Cultura en colaboración con Gálix inclúe 84 títulos representativos da literatura infantil e xuvenil galega, con informacións acerca dos ilustradores e escritores do país.