Vieiros

Os traballos de cabalete do mexicano Diego Rivera abren a partir do xoves a nova sé da Fundación Caixa Galicia na Coruña. A exposición da súa compañeira, Frida Kahlo, foi ben visíbel nos últimos meses na sé compostelá de Caixa Galicia. A caixa pecha así "un ciclo familiar, anque non artístico", pois aínda faltan muralistas como Sequeiros e Orozco. A exposición de Rivera consta de 43 obras escolmadas entre as 145 do museo Dolores Olmedo de México D. F., e que abranguen toda a súa traxectoria, desde o Autorretrato de Madrid, en 1907, que fixo con 21 anos, até as postas de sol que pintou en Acapulco en 1956, pouco antes de morrer.