Vieiros

O presidente da Xunta explicou no Parlamento que "é o momento de cambiar o modelo do PP no que os concellos están ao servizo dos entes provinciais para poñer a estes ao servizo dos municipios". Na súa intervención foi moi crítico coa xestión das deputacións galegas gobernadas polo PPdeG, indicando que o bipartito quere "cambiar a política voluntarista de subvención e dependencia por unha política moderna de concertación e de cooperación, que reforce a autonomía dos municipios e que lles dea capacidade a estes para atender a demanda da cidadanía".

Fronte á interpelación do líder do PPdeG, Emilio Pérez Touriño lembroulle ao grupo parlamentario popular a negativa dos presidentes das deputacións de Lugo, Ourense e Pontevedra, todos eles do PPdeG, a acudiren ao Parlamento para dar conta da actividade das institucións e abrir paso para unhas "mínimas relacións de coordinación coa Cámara galega". Touriño afirmou que o goberno "non pode estar inmóbil diante dun modelo que amosou un claro fracaso no seu funcionamento".

Ao fío, lembrou que no compromiso de goberno asinado por PSdeG e BNG recolleuse de xeito explícito que o executivo galego tomará as decisións oportunas para coordinar a acción das deputacións provinciais "por medio dunha lei e da elaboración dun pla único de obras e servizos", no sentido en que o propio Estatuto de Autonomía e a actual lei de bases de rexime local xa permiten que se poida facer. "É necesario un modelo de artellamento territorial eficaz", insistiu Touriño anunciando que a modernización das deputacións é clave nesa tarefa e laiándose de que o modelo executado polo PPdeG "non contribuíu ao equilibrio do país". Nese contexto, o presidente da Xunta pediulle ao novo líder dos populares que deixe de "estar á defensiva e poñer obstáculos todos os días no camiño das reformas" e que amose "autonomía plena no compromiso de poñer en marcha dunha vez a reforma do estatuto".

O PPdeG oponse a calquera modificación do sistema actual
"O presidente da Xunta non ten lexitimidade para pedir a coordinación das deputacións provinciais mentres non coordine a acción do seu Goberno", afirmou o presidente do PPdeG, Alberte Núñez Feijoo, na súa internvención no Parlamento.

Feijoo atacou a Touriño reprobándolle que "di que non pensa na abolición dos organismos provinciais e logo que no proceso de reforma estatutaria habería que revisar o papel das deputacións, pero non di como, mentres o conselleiro de Presidencia e os do BNG din que hai que abolilas e o conselleiro de Traballo di que vai aumentar a súa representatividade nas municipais".

Ao fío, o voceiro do PPdeG espuxo que o ditame recente do consello consultivo, solicitado polo propio presidente da Xunta, subliña que "respecto das entidades provinciais existe unha garantía constitucional infranqueábel (...) que imposibilita a desaparición da provincia coma entidade dotada de autonomía a xestión dos seus propios intereses".