Vieiros

O ministro de Asuntos Exteriores do Perú vén de anunciar en rolda de prensa que o ex presidente Fujimori foi detido en territorio chileno logo que o goberno daquel país executase a orde de captura solicitada pola xustiza peruana ao coñecer da súa chegada desde Xapón en voo privado. Abusos de poder, corrupción e violación dos dereitos humanos, entre outros a súa permisividade cos "escuadróns da morte", suman até vinte cargos contra Alberto Fujimori, que gobernou Perú entre 1990 e 2000. Con nacionalidade xaponesa desde aquela, Fujimori anunciara a súa intención de volver ser candidato nas presidenciais de 2006.