Vieiros

O primeiro ministro turco, Racep Tayip Erdogan declarou que aqueles que non poden afacerse á idea de ver a Turquía na UE non desexan a harmonía entre civilizacións. Pola súa parte, o ministro de Asustos Exteriores turco, Abdullah Gual, advertira que non iría a Luxemburgo até que os 25 non chegasen a un acordo.

Austria trataba de impedir que se incluise o termo "adhesión" no texto que establece o marco do proceso de negociación para a incorporación de Turquía á Unión Europea. Pola contra, o resto de socios da Unión apostan por unha plena adhesión dos turcos.

Posíbel comezo de negociacións tamén con Croacia
Por outra parte, a fiscal xefe do Tribunal Penal Internacional para a antiga Iugoslavia, Carla del Ponte comunicoulles aos ministros de exteriores da UE que as autoridades croatas "cooperan plenamente" con ese organismo na persecución dos criminais de guerra. Este informe favorábel podería abrir tamén a vía para o comezo das negociacións para a adhesión de Croacia á UE. "Podo dicir que desde hai semanas, Croacia está cooperando plenamente conosco e está facendo todo o que pode para localizar e deter ao ex-xeneral Ante Gotovina, (acusado de crimes de guerra)", sinalou Carla del Ponte.