Vieiros

A presunta ameaza terrorista global, recorrente no discurso de líderes coma Bush e Blair, e que de xeito evidente serviu para aplicar solucións militares fronte a iniciativas diplomáticas e para lanzar operacións encamiñadas á busca de hexemonías xeoestratéxicas e económicas, das que Afganistán e Iraq son exemplo evidente, agocha tamén outras motivacións.

O pasado mes de outubro, nun foro xudicial internacional en Francia, os Maxistrados europeos pola democracia e a liberdade amosaban a súa preocupación pola evolución do debate sobre as liberdades na Unión Europea. Os "dereitos fundamentais das persoas e as súas liberdades democráticas" están ameazadas pola "cultura da seguridade importada dos EEUU", advertían. Os expertos aló reunidos avertiron a posibilidade de que esa "obsesión antiterrorista" estivese poñendo en perigo as liberdades básicas dos cidadáns.

Excesos con escusa antiterrorista
Iniciativas estadounidenses co cualificativo de proxecto contra o terrorismo coma é a suspensión de garantías constitucionais para cidadán considerados "combatentes inimigos" tiveron a súa versión en territorio británico con polémicas medidas, cuestionadas nos tribunais, que autorizaban detencións indefinidas e mesmo negándolle acceso a avogados aos detidos por este tipo de acusacións.

A intención do executivo británico de aproveitar a súa presidencia de quenda e o estado de opinión resultante dos ataques en Londres para estender a toda a Unión Europea a esixencia de retención e control dos datos das comunicacións telefónicas e internáuticas é exemplo significativo de cara a onde están camiñando os gobernos. Unha ollada ao que xa está acontecendo nos EEUU pode darnos pista dos próximos pasos no recurte de liberdades. Aló, a Electronic Frontier Foundation vén denunciando os intentos do goberno Bush de controlar computadores e bases de datos. O sutil cambio logo do 11S que o equipo Bush facía co nome do proxecto Coñecemento de Información Total por Terrorism Information Awareness é exemplo de como os atentados que gañan a primeira plana dos medios reforzan a impunidade coa que os gobernos se exceden con estas prácticas.