Vieiros

"Ademais, non ten ningunha experiencia neste tipo de asuntos", insistiu o líder dos populares sobre Miguel Cortizo, deputado do PSdeG no Parlamento galego escollido polo ministerio de Asuntos Exteriores coma embaixador en "Misión Especial para a Coordinación das Relacións coas Comunidades". "É un nomeamento que se produce única e exclusivamente para que esa persoa manipule os votos dos residentes españois no extranxeiro cara ás eleccións de Galiza", asegurou Mariano Rajoy, quen chegou a cualificar a decisión de "asalto ás institucións".

Paradoxalmente, e segundo revelou o propio Cortizo, dende o goberno autonómico galego teríalle chegado xa, unha vez coñecido o seu nomeamento, unha felicitación do propio presidente da Xunta, Manuel Fraga. Segundo Cortizo, a postura de Rajoy tería que ver coa "campaña de acoso ao ministro Moratinos" logo das acusacións deste sobre a implicación do anterior executivo no golpe de Estado en Venezuela. O deputado socialista cualificou a actitude de Rajoy de "desprezo" coa comunidade emigrante en América.