Vieiros

O profesor Henrique Costas considera que os erros que contén o Verbum son froito da "precipitación" e do "autoodio" de Carlos Príncipe, concelleiro de cultura da corporación viguesa. Ademais, explica que a Facultade de Filoloxía e Traducción da UVI se ofreceu a colaborar no proxecto pero "aínda estamos agardando a resposta".

Costas amósase especialmente indignado co tratamento da lingua galega; no ordenador de onomástica, non poden consultarse nomes galegos e na sección de audio de contos, tampouco; si hai un espacio para a lingua galega nas cabinas telefónicas que permiten escoitar falantes de distintos idiomas. Sen embargo, o fragmento que nos representa non presenta trazos fonéticos demasiado auténticos.

No mapa lingüístico galego continúan os erros, ao situar diversos puntos da fala exterior dentro das fronteiras administrativas de Galicia. O plano da toponimia, que abrangue todo o Estado español, só contén información sobre o étimo de cinco cidades galegas, "cando temos un tercio dos topónimos de todo o Estado", di Costas, "é unha mágoa que un veciño de Figueiras non poida consultar nada sobre o nome da súa aldea".

Con respecto aos letreiros e rótulos, o filólogo asegura que o galego aparece sempre nun segundo lugar, e non sempre correctamente, de xeito que podemos atopar sorprendentes parellas de palabras como: "stop/stop" ou "pura lana/pura lana", en vez de "pura la".

O panel de linguas indoeuropeas, cita o "africano" dentro da familia xermánica, cando en todo caso debería ser o "africander", segundo explica Costas. Ao parecer, as linguas amerindias, africanas e semíticas están ausentes no museo, pero si aparecen idiomas inexistentes como o "indonesio" ou o "chileno".

A listaxe de erros é extensa: "confúndense termos como lingua e linguaxe e atribúeselle a traducción literal unicamente aos ordenadores, como se os traductores só puidesemos facer traducción literaria", continúa o profesor da Universidade de Vigo.

Por outra parte, non se cita a autoría duns versos de Celso Emilio Ferreiro, nin dos palíndromos de Gonzalo Navaza, nin das gravacións recollidas por Francisco Fernández Rei, que aparecen no mapa lingüístico de Galicia.

A pesar de todo, Costas recoñece que o Verbum ou Casa das Palabras é "unha idea fantástica" que de corrixir os erros, "pode dar lugar a unha aprendizaxe moi boa".