Vieiros

As dúbidas sobre a base xurídica e as posibles irregularidades nos autos dictados polo xuíz Carlos del Olmo que levaron ao peche de Egunkaria, daríanlle base a unha demanda por prevaricación que incluiría a esixencia de indemnizacións. Así o pensan os accionistas do diario, que reunidos en Tolosa a fin de semana acordaron traballar pola unidade con traballadores, suscriptores e mesmo lectores e acreedores, a prol dunha plataforma que leve adiante a petición de indemnizacións previo paso pola demanda por prevaricación ao xuíz encargado do caso. Debateuse tamén o camiño a seguir para a creación dun novo diario autónomo en euscara, para o cal xa prometeu axuda a conselleira vasca de Cultura.

Ao tempo, dende a revista Argia infórmannos da entrada en prisión o pasado venres de Pello Zubiria, a quen non se lle permitiu a visita de ssúa muller ese día malia o seu grave estado de saúde. Compañeiros do xornalista e familiares insisten na súa petición ás institucións vascas e organizacións de dereitos humanos que presionen para que Zubiria, quen sofre unha enfermidade crónica irreversible, sexa posto en liberdade.