Vieiros

Cando as aves mariñas perden a impermeabilidade da plumaxe debido ao petróleo, acoden ás praias. Primeiro tentan limparse. Logo, buscan refuxio entre a vexetación máis próxima. Achegarse a elas, prendelas e inmobilizalas non é complicado se se seguen estas indicacións:

• Usaremos luvas grosas de goma para evitar o contacto directo co petróleo, que pode irritarnos a pel e as mucosas. Levaremos con nós unha toalla, ou algo semellante.
• Achegarémonos á ave de vagariño dende a beira do mar, para evitar así que queira fuxir nesta dirección.
• Por suposto, a nosa seguridade é o primeiro. Non nos aventuraremos en áreas de mar batida ou entre penedos perigosos.
• Se parece difícil de prender, non hai que querela cazar, pois o único que conseguiremos será esgotala aínda máis.
• Ao apreixala, é moi importante levar coidado cos peteiros das especies de maior tamaño. Tentarán picarnos, principalmente no rostro, e poden causarnos graves feridas.
• Non se poden suxeitar ou prender por unha á, pois poderíamos partirlle un óso.
• Rodearémola coa toalla, e introducirémola nunha caixa de cartón seca e aireada. Non se deben xuntar na mesma caixa a dúas ou máis aves, sobre todo se son de distinta especie, pois poden agredirse.
• Se a ave presenta petróleo no peteiro e nas foxas nasais, limparémosllo cun trapo húmido.
• Logo levaremos as caixas e porémonos rapidamente en contacto co Centro de Recuperación de Fauna Salvaxe da Consellería de Medio Ambiente máis próximo. Nunca tentaremos recuperalo pola nosa conta. Estes son os teléfonos dos centros de recuperación das provincias costeiras:
  - A Coruña - Oleiros: 981626241
  - Pontevedra - Vilaboa: 986680238
  - Lugo: 982207705
  - SOS Galicia: 112