Vieiros

Acaba de saír o número un da revista Tempo Exterior, segunda época, publicada polo Instituto Galego de Análise e Documentación Internacional (IGADI). A iniciativa pretende achegar á sociedade galega reflexións e análises de temas internacionais de certa actualidade e proxección. Neste primeiro número preséntanse dous eixos temáticos principais. O primeiro, arredor da pesca, afonda na situación en Marrocos, no Sáhara Occidental e acompaña unha entrevista co Presidente da Comisión de Pesca do Parlamento Europeo, o eurodeputado galego Daniel Varela. O segundo céntrase en Europa, nos problemas do alargamento e as súas consecuencias para Galicia (da man dos eurodeputados Rosa Miguélez e Camilo Nogueira), cunha aproximación a situación política dun dos países candidatos á ampliación e un balance da guerra de Cosova.